Asgeir Kvernberg og Jan Olav Hesthaug var på synfaring i Muldalen 23. april saman med grunneigar Nils Helge Muldal i samband med at Storfjordstemnet 2012 er bestemt flytta dit.

Storfjordstemnet 2012 er bestemt flytta til Muldalen i Norddal kommune.
Dato er den samme som tidlegare annonsert søndag 3. juni.

Stemnet var tidlegare bestemt lagt til Ytste Skotet, men på grunn av ras i råsa opp til Ytste Skotet og skadar både på flytebrygga ved Skotet og kaia på Dyrkorn er det no bestemt å flytte det.

Muldalen ligg om lag ein kilometer frå Tafjord. Vi kjem attende med nærare opplysningar om program, parkering, skyss m.v.

Årsmøtet vart halde på kyrkjestova på Stranda 24. mars med 18 frammøtte.
Asgeir Kvernberg vart attvald som styreleiar. Også Solveig Homlong vart attvald, medan Jostein Ringdal og John Inge Smoge ikkje var på val. Nye inn i styret er Kjell O. Løseth og Gro Anita Bårdseth. Nestleiar gjennom fleire år, Ingrid Løset, gjekk ut av styret, og det same gjorde styremedlem Finn Helge Nustad.

Datoane for dugnadshelgene i 2012 er 20-22. april, 17-19. august og 28-30. september.

I år er det Storeløa heile sesongen. Det har mange gleda seg til etter fleire sesongar med sjøveg og vedlikehald i tunet. Leiar i dugnadsgruppa Geir Ola Vatne håper det blir god deltaking på dugnadane i år, og kjenner nokon av dykk personar som kunne tenke seg å prøve ei dugnadshelg på Skotet, så må de prøve å få dei med.